रूस सबैभन्दा धेरै कोरोनाभाइरस संक्रमित भएको दोस्रो राष्ट्र बनेको छ ।
आइतबारसम्म त्यहाँ कोरोनाभाइरस संक्रमितको संख्या २ लाख ८१ हजार ७ सय ५१ पुगेको हो। त्यस्तै संक्रमणबाट मृत्यु हुनेको संख्या भने दुई हजार ६ सय ३१ छ।

रूसमा औसत दैनिक १० हजारको दरले संक्रिमित थपिँदै गएका छन्। शनिबार मात्रै त्यहाँ ९ हजार दुई सय संक्रमित थपिएका थिए भने ११९ जनाले ज्यान गुमाएका थिए । त्यस्तै शुक्रबार १० हजार ५ सय ९८ संक्रमित थपिएका थिए भने १ सय १३ ले ज्यान गुमाएका थिए । गत वैशाख २१ गते रूस सबैभन्दा बढी कोरोना संक्रमित भएका मुलुकमा सातौं नम्बरमा थियो तर दुई सातामा यो दोस्रो स्थानमा उक्लिएको हो ।

त्यहाँ आमनागरिकलाई मात्र नभइ रूसी प्रधानमन्त्री मिखाइल मिसुस्तिनमा पनि कोरोनाभाइरसको संक्रमण देखिएको छ । गत मंगलबार राष्ट्रपति भ्लादमिर पुटिनका प्रवक्ता डिम्ट्री पेस्कोभमा समेत कोरोना संक्रमण देखिएको उनले बताएका थिए । अहिले सबैभन्दा बढी संक्रमित भएको राष्ट्र अमेरिका हो । त्यहाँ १५ लाख ८ हजार ९० संक्रमित छन् भने ९० हजार एक सय २३ जनाले ज्यान गुमाइसकेका छन् ।

अन्य राष्ट्रको तुलनामा रूसमा संक्रमितको संख्या तीव्र गतिमा बढेपनि मृत्यु दर भने कम छ । रूसपछि सबैभन्दा बढी संक्रमित स्पेन, बेलायत, ब्राजिल र इटालीमा छन् । स्पेनमा २७ हजार ६ सय ५०, बेलायतमा ३४ हजार ४ सय ६६, ब्राजिलमा १५ हजार ६ सय ६२ र इटालीमा ३१ हजार सात सय ६३ संक्रमितको मृत्यु भइसकेको छ । अहिले रूसमा संक्रमणको संख्या तीव्र गतिमा बढेपछि ३१ मे सम्मका लागि लकडाउन लम्ब्याएको छ। यसअघि मे ११ सम्मका लागि लकडाउन गरिएको थियो।

आइतबार, जेठ ०४, २०७७मा प्रकाशित गरिएको