ज्वाला अपडेट
हुम्ला । हुम्लाका एक युवकलाई केटी पक्षका आफन्तले अन्तरजातीय विवाह गरेकै कारण कुटपिट गरी बेपत्ता बनाएका छन् । हुम्ला जिल्ला सर्केगाड गाउँपालिका १ को जैर गाउँका १९ वर्षीय चन्द्रे कामीले मुगु सोरु गाउँपालिक ४ स्थित लिप्रा गाउँकी १९ वर्षीया सुन्तली मल्लसँग एक महिना अगाडि भागी विवाह गरेका थिए । तर, केटीका आफन्तले कुटपिट गरी युवकलाई बेपत्ता बनाएका छन् ।
गत मंसिर २९ मा केटी पक्षका आफन्तले कामीको घरमै पुगेर चन्द्रे र सुन्तलीलाई माइती घरमा ल्याएर युवकलाई कुटपिट गरी बेपत्ता बनाएको युवकका परिवारले बताएका छन् । ठकुरीकी छोरीसँग कामीको छोराले विवाह गरेको भन्दै युवती पक्षले छोरालाई निर्घात कुटपिट गर्नुका साथै तीन दिनदेखि बेपत्ता पारेको चन्द्रेका बुवा धनजय कामीले बताए । केटी पक्षका मान्छे आएर छोरा र बुहारीलाई लिएर गएको र छोरा सम्पर्कविहीन रहेको उनको भनाइ छ । तर, सुन्तली भने गाउँमै भेटिएको जिल्ला प्रहरी कार्यालय हुम्लाले जानकारी दिएको छ । युवकको खोजी भइरहेको हुम्ला जिल्लाका प्रहरी नायब उपरीक्षक हेरम्ब शर्माले जानकारी दिए ।
छोरा र बुहारीलाई अपहरण र कुटपिट गरेपछि आफूले १ पुसमा प्रहरीलाई जानकारी गराएको उनले बताए। छोरीलाई घरमा राखेर केटालाई बेपत्ता बनाएको आफूले जानकारी पाएको सर्केगाड १ का वडा अध्यक्ष गोकुल बुढाले बताए।
मंगलबार, पौष ०६, २०७८मा प्रकाशित गरिएको
१.
२.
३.
४.
५.
६.
