ज्वाला अपडेट
सुर्खेत, असार २ । कर्णाली प्रदेशमा मंगलबारसम्म एक हजार ८६ जनामा कोरोना पुष्टि भएको छ । कोरोना भाइरसको संक्रमणबाट निको भएर ३ सय ४२ जना घर फर्किएका छन् । कर्णालीमा भारतबाट आउने नागरिकको संख्या दिनप्रतिदिन बढेका कारण पनि संक्रमणको उच्च जोखिममा कर्णाली छ ।
सुर्खेतस्थित प्रदेश अस्पताल, जुम्लास्थित कर्णाली स्वास्थ्य विज्ञान प्रतिष्ठान, दुल्लु अस्पताल दैलेख, सल्यान अस्पताल लगायतबाट हालसम्म ३ सय ४२ जना सक्रमितहरू निको भई घर फर्किएका हुन् ।
मंगलबार मात्रै दैलेखको जिल्ला अस्पतालबाट १ सय २० जना, दुल्लु अस्पतालबाट २७ जना र सल्यान अस्पतालबाट ४१ जना र सुर्खेतस्थित प्रदेश अस्पतालबाट तीन गरी कुल १ सय ९१ जना घर फर्किएको सामाजिक विकास मन्त्रालयको स्वास्थ्य सेवा महाशाखाका प्रमुख डा. लक्ष्मीनारायण तिवारीले बताए । डा. तिवारीका अनुसार यसअघि विभिन्न समयमा गरी १सय ५१ जनाले कोरोनालाई जितेर घर फर्किएका छन् ।
मन्त्रालयको तथ्याङ्क अनुसार दैलेखमा सङ्क्रमितको संख्या ६ सय ३४जना, सुर्खेतमा २ सय ३५, सल्यानमा १ सय ३७, कालीकोटमा २८, जुम्लामा २४, जाजरकोटमा ८, मुगुमा २, हुम्ला र डोल्पामा एक÷एक जना संक्रमित फेला परेका छन् । अहिलेसम्म रुकुमपश्चिममा भने कोरोना संक्रमित भेटिएका छैनन् । कोरोनाबाट कर्णालीमा तीन जनाको मृत्यु भएको छ ।
मंगलबार, आषाढ ०२, २०७७मा प्रकाशित गरिएको
१.
२.
३.
४.
५.
६.
